Dua a nagsaruno a vehicular accident ti napasamak idiay Tuba, Benguet itay kallabes.
Pakairamanan daytoy ti napasamak a panagsikig ti maysa a taxi idiay Km7, Asin Road, Tadiangan, Tuba idi February 7 nu sadino, nadangran ti driver ken dagiti lima a pasahero daytoy.
Iti imbestigasyon ti Tuba Municipal Police Station, paandaren koma ti driver ti nasao a taxi idi killaat nga immabante daytoy.
Pinadas ti driver nga inpreno ngem saan a kimmagat rason nga indungparna iti kongkreto a pader iti igid ti kalsada.
Gapu iti kapigsa ti impact, nagsikig ti lugan, nadadael ti front bumper ken ti windshield daytoy.
Kabayatanna, kalpasan a naipaayan iti first aid dagiti nadangran, naiturong dagitoy iti pagagasan para iti panakatamingda.
Iti sabali a bangir, maysa met a 10-wheeler truck ti naaksidente idiay Marcos Highway, Poblacion,Tuba, Benguet agsapa iti simmaruno nga aldaw.
Ti nasao a lugan ket naglaon iti chicken dung.
Iti impormasyon manipod kapulisan, saan a kinabaelan ti truck a sang-aten ti akikid a paset ti kalsada a pakaipatpatungpalan ti road construction.
Gapu iti dayta, inreverse ti driver ti imanmaneho daytoy a truck tapno makabwelo koma.
Nupay kasta, napukaw ti kontrolna rason a nagderetso nga immatras ti truck iti agarop 40 a metro.
Gapu iti dayta, naidungpar daytoy iti kongkreto a paset ti maysa nga store ken naipasikig metlaeng daytoy.
Iti nasao nga aksidente, nadangran ti driver bayat a ti kadwana a pahinante ket saan a naan-ano.
Mainaig iti dayta, nagpalagip dagiti otoridad kadagiti motorista seknan iti panagannad iti panagmaneho.//Bombo Noveh Organo
