Dua a nagsasaruno a vehicular accident ti nailista dagiti kameng iti Baguio City Police Office-Police Station 9 itay nabiit.
Umuna ti aksidente a napasamak idiay sadiay KM3 Asin Road, Baguio City a nakairamanan iti maysa nga Isuzu Utility Van nga inmaneho iti agtawen iti 41 a lalaki a residente iti Upper Fairview, Baguio City ken ti maysa nga agtawen iti 12 a lalaki a residente met iti KM3 Asin Road, Baguio City.
Maibasar iti inisyal nga imbestigasyon dagiti kapulisan, magmagna ti ubing iti pedestrian lane paturong iti pagadalan idi nadungpar ti lugan daytoy a paturong met iti Suello Village.
Gapu iti dayta, nagsagrap ti biktima iti minor injuries iti nagduduma a paset iti bagina ngem dagus a naiturong iti Baguio General Hospital and Medical Center.
Iti kapada metlaeng nga aldaw, maysa manen nga aksidente ti naspasamak idiay Purok 2 , Irisan, Baguio City.
Nakairamanan daytoy ti maysa a dump truck nga inmaneho ti agtawen iti 24 a lalaki a residente iti Puguis, La Trinidad, Benguet.
Sigun iti imbestigasyon, agturong koma ti lugan idiay Lamtang ngem naidungpar daytoy iti poste iti BENECO iti kannawan a paset iti kalsada a gapuanan iti panakabaliktad ti truck ken temporaryo a panakapukaw ti suplay iti kuryente iti paset nakapasamakan iti nasao nga aksidente.
Gapu iti dayta, nagsagrap iti panakadangran ti ulo ken ima ti driver bayat a nadadael ti makinkannigid ken sango a paset iti truck nga inmaneho daytoy.
Iti baet dayta, dagus a naipaayan ti driver iti first aid sakbay a naitaray idiay Baguio General Hospital and Medical Center.
Agparparang met nga idi napasamak ti aksidente idiay Purok 2 , Irisan ket adda iti impluwensya iti arak ti driver.
Posible met a pabayadan ti Benguet Electric Cooperative ti nadadael a poste iti kuryente.//Bombo Noveh Organo
