BAGUIO CITY – Puntirya ti Baguio City a mangabak iti dua a kategorya ti nalatak a Philippine Management Association of the Philippines (PMAP) Awards ita a tawen, partikular inton bulan ti Hulyo.
Sigun kenni City Human Resource Management Officer Atty. Augustin Laban III, daytoy ket ti Employer of the Year para iti lokal a gobyerno ti Baguio ken ti People Manager of the Year para kenni Mayor Benjamin Magalong.
Kinunana a sumarungkar to ditoy Baguio dagiti opisyales ti PMAP ita nga aldaw tapnu mangisayangkat ti interview kadagiti napili nga opisyales ken empleyado ti lokal a gobyerno ti siudad.
Sigun kenkuana, paset daytoy ti proseso iti panakapili dagiti regional winners a pakapilyan met ti national winner iti tunggal kategorya.
Ti PMAP Awards ket maysa a values-driven, principles-led, evidence-based, innovation-enabled, output-oriented program a mangipapaay ti pammadayaw kadagiti organisasyon, indibidual ken people programs a nakaragpat ti excellence ken distinction iti panagimaton kadagiti tattao.
