Imimbestigaran ita ti embahada ti Pilipinas idiay United Arab Emirates ti damag a maatap a pannakaarestar ti dua a Pilipino idiay Dubai gapu iti maatap a panangirekord ken panangipablaakda iti videos iti mannarimaan a panagatake sadiay.
Sigun iti nasao nga embahada ken Consulate General idiay Dubai, ururayen dagitoy ti kumpirmasyon manipud iti otoridad ti United Arab Emirates maipanggep ti kinasiasino ken legal a sitwasyon dagiti dua a Pilipino.
Innayon pay ti nasao nga embahada a resrespetuen ti Pilipinas ti soberanya ti UAE ken linteg daytoy.
Gapu iti daytoy, nagpalagip ti embahada kadagiti Pilipino nga adda sadiay United Arab Emirates nga liklikada ti panangala ti video, panangipablaak iti internet, ken panagkomento iti saan pay laeng a nakumpirmar nga impormasyon maipanggep iti mapaspasamak sadiay.
Pinalagipanda pay dagitoy a mangala laeng ti update manipud kadagiti opisyal nga statement ti gobyerno ti United Arab Emirates. //Bombo Karen Sapirao
