Naisang-at wenno nairefer ti issue panggep iti maatap a korapsyon a napasamak babaen iti misuse of funds dagiti dua nga opisyal ti PTA, partikular ti Presidente ken Treasurer ti maysa a dakkel a pagadalan iti siudad ti Baguio.
Sigun kenni Malanie Pae, Incoming SPTA Officer ti pagadalan, immuna a napasamak ti mediation idi Septermber 21 nga atendaran kuma ti Principal, Uppat a headteachers, district supervisor, Chief Education Supervisor iti School Governance and Operations Division (SGOD), dagiti dua a mairekreklamo ken ti agrekreklamo.
Nu pay kasta saan a dimmar-ay dagiti mairekreklamo. Naituding manen ti saritaan idi Oktubre nga atendaran metlaeng kuma dagiti nadakamat iti immuna a mediation ngem saan metlaeng a dimmar-ay ti presidente ken treasurer.
Inlawlawag ni Pae, a ti mediation kuma ti agbalin a gundaway para kadagiti involved tapnu ilawlawag dagitoy ti nasao nga isyu ngem saan dagitoy a nagparparang.
Innayunna pay nga agingga ita ket saan pulos a nag-reach dagiti mairekreklamo kenkuana uray pay kalpasan nga immuna a naipadamag iti Bombo Radyo Baguio.
Kabayatanna, naaddan man dagitoy iti election para iti baro a PTA officers idi napalabas a bulan.
Nupay kasta agingga ita ket saan dagitoy a makagaraw gaputa awan ti oathtaking a napasamak, saan pay a naitunrover ti pondo nga iggem dagiti napalabas nga opisyal ken saan pay a naluklukatan a pulos ti PTA office para kadagiti baro nga elected officers pakairaman ni Pae.
Mainaig iti dayta, innayun ni Malanie Pae, Incoming SPTA Officer ti pagadalan nga adda man ti financial report a naipaay ngem photocopy laeng daytoy ken awan dagiti resibo.
Imbinsa-binsa ni Pae dagiti sumagmamano a maatap a saan nga umno a pannaka-aramat ti pondo kas iti panagpurchase ti sumagmamano a kagawaan nga awan met ti approval ti boards, pannakabusbus ti agarup 100k a pondo para ti teambuilding dagiti officers, pannakagatang ti jackets, ken panangipabulud ti pondo. Innayuna a naiyunay-unay kadakuada a ti kwarta a makolkolektar ket para laeng kadagiti estudyante.
Kidkiddawen daytoy iti pagadalan ken dadduma pay a maseknan a maadaan iti independent external audit tapnu mapatawan iti umno a pannusa ti Presidente kalpsan nga innalana dagiti dokumento ti complainant no sadinno sumagmamano kadagiti dokumento ti mangpaneknek a saan laeng nga ita a tawen nga adda dagiti napukpukaw a kwarta.
Iti pannakiuman ti Bombo Newsteam iti pagadalan inforwardnan ti nasao nga issue iti federation kalpasan a saan a nagparparang ti dua a respondent.
Iti agdama, maal-ala paylaeng ti benneg ti school federation.//Bombo Noveh Organo
