Naituding a mangilukat ti opisina ti Commission on Elections (Comelec) iti dua a satellite voter registration sites iti tunggal aldaw manipod Agosto 1 agingga iti 10, malaksid pay iti kangrunaan nga opisinana, tapno maakomodar dagiti agparehistro, nangruna dagiti eligible iti panagbutos iti Sangguniang Kabataan (SK).
Sigun kenni Atty. John Paul Martin, Election Officer ti COMELEC-Baguio, kayatda a mamaximize ti output nangruna iti Sanguniang Kabataan gaputa adda laeng ti sangapulo nga aldaw a naipaay kadakuada.
Puntiria ti nasao nga opisial nga agarup 200 a registrants iti tunggal aldaw, wenno agarup 2,000 a pakabuklan bayat ti registration period.
Kinuna ni Atty. Martin a nakapokusda kadagiti first-time nga agparehistro nga agtawen ti sangapulo ket lima agpangato tapno mapapigsa ti panagrehistro ti SK.
Dagiti naiplano a lokasion ti satellite ket ti Fairview Village ken Saint Louis University Navy Base; NIIT ken Irisan National High School; Pacdal ken Turod ti Laud a Quirino; Unibersidad ti Cordilleras High School ken ti Opisina ti Senior Citizens Affairs Office; Pinsao Proper ken Persons with Disability Affairs Office (PDAO); Bureau of Jail Management and Penology ken Baguio City National High School (BCNHS); Saint Louis University Navy Based and BCNHS; Fort Del Pilar and Sto. Tomas Proper, malaksid pay ti opisinada idiay Governor Pak Road.
