Agpatpataming ita dagiti dua a security escort ni Shariff Aguak Mayor Akmad Mitra Ampatuan kalpasan a nadangran dagitoy kabayatan ti panakaambushda idi kalman ti agsapa idiay Poblacion, Shariff Aguak, Maguindanao del Sur.
Iti naipablaak a CCTV footage ti nasao nga insidente, pinuntirya dagiti suspek a nakalugan iti mini van a pabettaken usar ti rocket-propelled grenade (RPG-7) ti nagluganan ni Mayor Ampatuan.
Nupay kasta, saan a nagballigi dagiti suspek a mapabettak ti lugan.
Kasaruno dayta, rumrumwar iti imbestigasyon a bimmales dagiti security escort ti nasao a mayor kadagiti suspek a nangitunda iti panagpipinnaltog agingga a nadangran ti dua kadagitoy.
Iti baet dayta, nabaelanda a mapaatras dagiti suspek ken nangipatungpal met dagiti otoridad iti hot pursuit operation a nangitunda iti ipupusay dagiti tallo kadagiti suspek.
Kabayatanna, rumrumwar a ti nasao nga insidente ti maikatlon a gundaway a naambush ti nasao a mayor ken maikatlo metten a gundaway a nakalasat daytoy.
