BAGUIO CITY – Simmukon kadagiti otoridad dagiti dua a suspek a nangbagsol iti 21-anyos a lalaki idiay Km5, Asin Road, Baguio City, pasado alas dose itay parbangon, Oktobre 1, 2024.
Immunan a nabigbig ti biktima a ni Jansel Pelayo, driver ken residente ti Tadiangan, Tuba, Benguet bayat a dagiti suspek ket ti agkabsat a da Rheycyriel Cabbigat Calado, 31 anyos ken Reynato Cabbigat Calado, 27 anyos, taxi driver ken agpada a residente ti Km6 Asin Road, Tuba, Benguet.
Iti interview ti Bombo Radyo Baguio, kinuna ni PMaj. Harriet Bulcio, Information Officer ti Baguio City Police Office, simmuko itay agsapa dagiti dua a suspek.
Maibasar iti inisyal nga imbestigasyon, dinakamat ni PMaj. Bulcio a nag-overtake ti SUV nga imanmaneho ti biktima iti sarsarunoenna a taxi nga imanmaneho met ti maysa kadagiti suspek.
Sigun kenni Bulcio, posible a simmakit ti nakem ti driver ti taxi ken ti kadwana rason a hinarangda ti lugan ti biktima.
Bimmaba dagiti suspek iti luganda ken ginuyodda ti biktima paruar iti luganna ken ditoyen a binagsolda.
Inaklon met dagiti suspek iti istasyon ti pulisya a naka-inomda idi napasamak ti krimen.
Iti agdama ket iggem ita dagiti otoridad dagiti suspek ken maisagsaganan ti kaskenan a kaso a maipila kontra kadakuada.
