BAGUIO CITY – Maisaksakad ita sadiay Senado ti panakaipasidong iti National Integrated Protected Areas System wenno NIPAS Law ti lima a biodiverse ngem threatened areas iti pagilian, pakairamanan ti dua a disso iti masakupan ti Cordillera Region.
Tarigagay ti Senate Bill 2278 a maideklara a protected landscape ken maawagan a Banao Protected Landscape iti maysa a paset ti lote sadiay Balbalan, Kalinga.
Naawagan ti nasao a disso kas “green heart” ti Cordilleras ken nalatak ti parke iti nagan a Balbalasang–Balbalan National Park nga addaan ti nabaknang a biodiverse landscape a pakasarakan ti maysa kadagiti most intact pine forests nga addaan ti endemic flora and fauna.
Tarigagay met ti Senate Bill 2280 a maideklara a protected landscape ti paset ti lote iti nagbabaetan ti Kabayan, Bokod ken Buguias iti Benguet; Tinoc iti Ifugao ken Kayapa, Nueva Vizcaya tapnu maipasigurado ti panakasalwad ti Mount Pulag National Park a kangatuan a bantay ti Luzon ken maikadua iti entero a pagilian.
Masarakan iti Mount Pulag National Park dagiti threatened mammals kas iti Philippine brown deer, Northern Luzon giant cloud rat ken ti Luzon pygmy fruit bat.
Sigun iti awtor dagiti nasao a gakat a ni Senator Cynthia Villar, dadaulo ti Senate Environment and Natural Resources Committee, mandato ti gobyerno a mangsalwad kadagiti amin a mula ken animal a masarakan iti pagilian para iti agdama ken masungad a henerasyon babaen iti panakabukel ti komprehensibo a sistema ti integrated protected areas.
