Nagpinnila iti kaso dagiti dua kadagiti tallo a nagdidinnangran nga indibidwal idiay Purok 2 Banig, Tawang, La Trinidad, Benguet idi January 12, 2025.
Maibasar iti imbestigasyon dagiti kameng iti pulisya, napasamak ti insidente iti pammagsol a nakairamanan dagiti tallo nga indibidwal a saanen nainaganan.
Dagitoy ket agpapada a laborer ken pasig a residente iti Tawang, La Trinidad, Benguet.
Bayat ti panaginomda iti nasanger nga arak, naaddaan iti saan a panagkinnaawatan iti dua kadagitoy a nakaitunda iti panagdinnangranda.
Iti damo ket awan pay iti nairaman nga igam ngem maysa kadakuada iti nagtalaw iti pakapaspasamakan iti insidente ken nagsubli metlaeng nga addaanen iti imet nga igam.
Gapu iti dayta, inguyod ti maysa pay nga indibidwal ti lalaki a mapapati a matagbat koma nu sadino, pinagawidna daytoy iti boarding housena tapno mailiklik iti posible panakadangran.
Nagturong ngarod ti lalaki iti boarding housena ngem sinurot daytoy dagiti dua a kinainomanna.
Gapu iti dayta, nangala met daytoy iti kutsilyo ken rimwar iti boarding housena tapno sangwen dagiti dua a kinainoman a nakasinnuppiatna.
Kasaruno dayta, napasamak ti panagdidinnangranda nu sadino, maysa iti nabagsol iti tengged ken dua ti nadangran iti ulona.
Iti agdama, agpapaimbagen dagitoy ken posible nga agsasangoda iti korte gapu iti kaso nga impilada iti tunggal maysa.//Bombo Noveh Organo
