BAGUIO CITY – Boluntaryo nga insuko ti duwa a sibilyan ti igam dagitoy nga awanan iti lisensya iti kampo ti 77th Infantry Battalion nga idadaulwan ni 1LT Junrey De Ocampo sadiay Brgy. Pinto, Alfonso Lista, Ifugao idi kalman.
Dagiti nasao nga indibidwal ket tubo ti Brgy. Bantay, Paracelis, Mt. Province.
Pakairamanan ditoy ti maysa a rifle nga addaan iti magazine ken caliber 30 garand rifle a tagikua dagiti ap-appoda ken nagdesisyon laeng dagitoy nga isuko para iti umno a disposisyon.
Maipalagip a sumagmamano metlaeng nga indibwal ti nangisuko kadagiti igam dagitoy iti kampo ni 1LT De Ocampo idi napalabas a tawen.
Babaen iti panangidaulo daytoy ket nakaalada iti dua a Cal 7.62 M14 rifles, siyam a Cal. 30, maysa a 9MM pistol ken maysa a carbine rifle.
Gapu iti daytoy, dinayaw ni Lt. Col. Nicolas Quemado Jr, commanding officer ti 54 Infantry Battalion ni 1LT De Ocampo gapu iti panangidaulo daytoy iti nadumaduma nga aktibidad.
Kinunana pay nga umno laeng ti desisyon dagiti nasao nga indibidwal iti panangisukoda kadagiti igam dagitoy.
