BAGUIO CITY – Sumango iti kaso nga illegal possesion of firearm dagiti dua nga agtutubo kalpasan a nagimetda ti iligal a paltog nga bayat ti panag-iinumda kadwada ti maysa a wanted person sadiay Tabuk City, Kalinga idi kalman.
Sigun iti Kalinga PPO, madama ti panag-iinum dagiti agtutubo kadwada ti suspek a maserbian koma ti warrant of arrest gapu iti kasona a panagtakaw.
Nupay kasta, kabayatan ti operasyon ti pulisya ket nakalibas ti wanted person a puntirya dagitoy bayat a nakemmeg met dagiti dua nga agtutubo a da Edison Nalog, 21-anyos ken ti 18-anyos, agpada a residente sadiay Kalinga.
Nakumpiskar kenni Nalog ti maysa a Colt MK1V Caliber 45 nga addaan ti uppat a bala, bayat a nakumpiskar iti 18-anyos ti dua a bala ti Caliber 45.
Awan ti lisensya ti igam a nakumpiskar manipud kadagiti suspek.
Iggem ita ti Tabuk City Police Station dagiti dua bayat a maisagsagana ti kaso a maipila kontra kadakuada.
