Dua nga estudyante ti nakumpirmar a pimmusay iti napasamak a shooting incident iti maysa a pribado a pagadalan idiay Zamboanga ita nga agsapa karaman ti lalaki suspek a nabigbig kas maysa a menor de edad ken high school honor student.
Sigun kadagiti otoridad, pasado alas-syete itay agsapa idi immawag kadakuada ti maysa a personnel ti pagadalan tapno ireport ti napasamak a shooting incident.
Dagos met daytoy a nirespondean dagiti otoridad.
Sigun iti inisyal nga imbestigasyonda, naiserrek ti suspek iti uneg ti pagadalan ti dua a klase ti paltog ken nagturong iti Room 404 iti building ti nasao a pagadalan ket ditoy metten a nangpalpaltog. Nangitunda daytoy ti ipupusay ti umuna a biktima a nabigbig kas lalaki a menor de edad ken maysa a Grade 10 student.
Kalpasanna, nagturong pay ti suspek iti dadduma a kadsaaran ti building ken nagpukpukaw sakbayna a pinaltogan ti bukodna a bagi.
Narecover met dagiti otoridad ti dua a 9mm firearms iti asideg ti bagi dagiti dua a pimmusay.
Iti agdama, imimbestigaranen dagiti otoridad ti napasamak nga insidente .
Immuna metten nga inwaragawag ti Philippine National Police ken Department of Interior and Local Government (DILG) a nainget a maimimbestigaranen ti napasamak nga insidente.
Iti sabali a bangir, inyebkas ti lokal a gobyerno ti siudad ti Zamboanga ti pannakipagriknada kadagiti naapektaran gapu iti nasao a shooting incident.
Kagidan dayta, nagkiddaw daytoy iti publiko a liklikanda ti mangiwaras kadagiti saan a naberipikar nga impormasyon ken ipaima kadagiti otoridad iti panagduktal iti motibo iti napasamak nga insidente.
Suspendido met ti klase iti nasao a pagadalan agingga inton bigat, August 19, tapno maikan-dalan ti imbestigasyon ti napasamak a shooting incident. //𝒦cs//