Ad-adalen ti kampo dagiti independent contractors a da Jojo Nones ken Richard Cruz a mangi-apela ti resolusion iti Department of Justice (DOJ) seknan iti mapapati a panagrames kenni aktor Sandro Muhlach.
Daytoy ket kalpasan a nangipila ti Department of Justice ti maysa a kaso a panagrames babaen ti sexual assault ken dua a kaso ti acts of lasciviousness kontra kada Nones ken Cruz iti Pasay Regional Trial Court (RTC).
Sigun iti abogado ti dua nga independent contractors a ni Atty. Maggie Abraham-Garduque, ti grounds nga inkabil ti Department of Justice para kadagiti darum ket saan a mangsuporta kadagiti natakuatan dagitoy.
Gapu iti dayta, iyapelada ti resolusion ken mangipilada pay ti “motions to quash the informations” iti korte.
Nangipila ti nasao nga ahensia kontra kadagiti nasao nga indibidual kalpasan a nakasarak iti “prima facie evidence” nga addaan ti nainkalintegan a rason tapno sungbatanda ti krimen nga inaramid dagitoy.
Kalpasan ti panangipila ti kaso kontra kada Nones ken Cruz, kinuna ti kampo ni Muhlach a maysa laengen nga addang sakbay ti pananggun-odda ti hustisia.
Maipalagip nga idi bulan ti Agosto, nangipila ti reklamo ni Muchlach ken ti National Bureau of Investigation kontra kenni Nones ken Cruz gapu iti mapapati a sexual assault.
Nupay kasta, pinaglibakan met amin dagitoy ni Nones ken Cruz.
