Dua nga indibidual, nadangran iti panangdungpar ti lugan nga immaneho ti maysa a pulis
BAGUIO CITY–Agtaltalinaed pay laeng iti pagagasan ti maysa a laborer ken negosyante kalpasan a nadangran dagitoy iti panangdungpar ti maysa a pajero nga immaneho ti maysa a pulis sadiay Km. 5 La Trinidad, Benguet iti kalman.
Nagbigbig dagiti biktima a da Jeffrey Bravante Ortin, 30-anyos, laborer ken residente ti Loakan, Baguio City ken ni Orlando Mondero Galbey, 43-anyos, baro, ken residente ti Samoyao, Cruz, La Trinidad, Benguet.
Agpada dagitoy a naiturong iti Pines City Doctors Hospital ken naituding a maipasidongda iti operasyon gapu iti nasagrapda a fracture.
Nabigbig ti driver ti lugan a ni PO2 Gerald Galleo Galutan, 32-anyos, personnel ti Cordillera Crime Laboratory ken residente ti Balili, La Trinidad, Benguet.
Maibasar iti report, dumaldalyasat ti lugan iti paturong iti northbound bayat nga agbaballasiw dagiti biktima idi killat a dinungpar daytoy ti lugan nga immaneho ti nasao a pulis.
Nagdiretso pay daytoy iti kalsada agingga a nadungparna ti maysa a police car ti La Trinidad MPS.
Nadungparna manen ti maysa a poste ti kuryente ken ti maysa a cellphone repair shop agingga a nagsardeng iti dinungparna nga alad ti Benguet State University.
Naduktalan nga awan ti imet a driver’s license ti nasao a pulis ken maatap a nakainom daytoy iti arak iti napasamak ti insidente.
