Pimmusay ti dua a pasahero kalpasan a natnag ti nagluganan dagitoy a White Nissan Navarra Pro4x Pick-up iti 300-meter ti kaunegna a rangkis sadiay Sitio Jappas, Brgy. Bobok-Bisal, Bokod, Benguet pasado alas tres itay parbangun.
Naideklara a pimmusay dagiti biktima a da Sison Paut, 55-anyos, consultant ken Chacami Paut, 75-anyos pasado alas nuebe itay agsapa.
Maibasar iti inisyal a report ti Bokod Municipal Police Station, nagtaud ti pick-up truck a nagluganan dagiti lima nga indibidual idiay Tabuk City, Kalinga ken manarimaan a dumaldalyasat iti Ambuklao Road paturong iti siyudad ti Baguio.
Nopay kasta, napukawan iti control ti drayber rason a natnag ti nagluganan dagitoy.
Naiturong met iti Baguio General Hospital dagiti lima nga indibidual ngem dua kadagiti pasahero ti pimmusay, matamtaming dagiti dua pay a pasahero bayat a ti drayber ket nakaruaren ken naiturong iti Bokod Municipal Police Station.
Padaanan ti interview ti Bombo Radyo kenni PCPT. Juliet B. Kaniteng, OIC ti Bokod MPS para iti kanayonan a detalye, 7:30 ti rabii.
