BAGUIO CITY – Pimmusay ti dua nga indibidual iti nagsaruno nga insidente ti pammaltog ken panagtagbat sadiay Manaois, Poblacion, Lagayan, Abra idi malem kalman.
Nabigbig dagitoy a da Wilson Langgi Tunggalan, 48-anyos ken Johny Abig Bautista, 39-anyos.
Maibasar iti report ti pulisya, pangaldaw idi kalman idi nagiinom ti arak dagiti dua, kadwada ni Dindo Langgi Tunggalan, 42-anyos ken tallo pay nga indibidual iti kallapaw ni Johny Bautista.
Nupay kasta, iti kamalemanna, timmaud ti nabara nga argumento iti nagbaetan dagiti dua Wilson Tunggalan ken Johny Bautista.
Pimmanaw ni Bautista ngem nagsubli a nakaimet ti shotgun ken pinaltoganna ti tengnged ni Wilson Tunggalan.
Nakita met ni Dindo Tunggalan ti panakapaltog ti kabsatna isut gapuna a tinagbatna ti tengnged ken kanigid nga abaga ni Bautista.
Dagus a pimmusay ni Bautista bayat a naitaray iti Abra Provincial Hospital ni Wilson Tunggalan ngem naideklara a dead on arrival.
Tiniliw met dagiti nagresponde a pulis ni Dindo Tunggalan bayat a narekober dagiti shotgun ken buneng a naaramat iti krimen.
Rumrumwar pay iti imbestigasyon ti pulisya a nalaus a kinabartek ken saan a panagkinnaawatan ti rason ti napasamak a krimen.
