BAGUIO CITY- Pimmusay ti dua nga indibidual bayat a naitaray dagiti uppat a dadduma pay iti ospital kalpasan a natnag ti naglugananda nga elf iti irrigation canal sadiay Purok 6, Tuliao, Barangay Calanan itay agsapa.
Maibasar iti report, nagtaud dagiti biktima manipud Barangay Agbannawag ken dumar-ay koma dagitoy ti Men’s Fellowship Assembly sadiay Apayao.
Kabayatan ti panagdalyasatda iti kalsada ket napukawan ti driver ti kontrol iti lugan a nangitunda iti panagduretsoda iti irrigation canal. Gapu iti daytoy, pimmusay da Edwin Capuyan ken Jayson Bang-ay Kinto, bayat a naitaray iti ospital da Marlon Masedma Kis-ing, 35; Jaymar Bistacion Badillo, 31; ken Daniel Casim Cudal, 57.
Nagpaut iti dua nga oras ti search and retrieval operation nu sadino nasarakan dagiti otoridad ni Capuyan, maysa a metro ti kaadayona manipud iti nakapasamakan ti insidente.
Nupay kasta, naideklara daytoy a dead on arrival iti ospital. Naipadamag a pimmusay metlaeng ni Kinto bayat ti panakatammingna iti ospital.
Iti agdama ket agpapaagas dagiti uppat a dadduma pay iti Kalinga Provincial Hospital.
