Agpatpataming itan iti pagagasan dagiti dua nga indibidual a nakuryente sadiay Asin Road, Tadiangan, Tuba, Benguet idi kalman.
Iti eksklusibo a panakiuman ti Bombo Radyo kenni Feliciano Buyagao Alipda Jr., ti kapitan iti Tadiangan, Tuba, Benguet, kinunana a manarimaan ti panagtrabaho dagiti dua a lallaki iti retaining wall ti maysa a pagadalan idi napasamak ti panakakuryenteda kalpasan nga inyawat ti maysa a katrabahoanda ti metal pipe nga aksidente a naisagid iti nakauy-oy a live wire.
Sigun kenni Alipda Jr., dagiti biktima ket nabigbig a da Hirry Malid-eng, 34-anyos, naasawaan, laborer, tubo ti Boliney, Abra, ngem iti agdama ket agtaltalinaed sadiay Carlos Heights, Baguio City ken ni Andres Ayao-ao Pangespan, 36-anyos,
single, laborer, tubo ti Betwagan, Sadanga, Mt. Province, ken iti gadama ket agtaltalinaed met sadiay Kias, Baguio City.
Kinuna ti kapitan a maysa kadagitoy ti natnag iti 12 feet a kangato rason a nagsagrap daytoy iti first degree burn nu sadino naituding a maipasidong iti CT Scan ti ulona bayat a ti maysa met kadagitoy ti nagsagrap iti pipikil iti sakana.
Kinuna ti kapitan a nagkiddawen ti kontraktor ti nasao a konstruksyon iti insulator iti Benguet Electric Cooperative, Inc. (BENECO) kas pammilin daytoy idi damo ngem posible a manarimaan paylaeng ti panakaiproseso ti kiddaw dagitoy.
Iti agdama, temporaaryo paylaeng a naipasardeng ti konstruksyon bayat a maur-ray ay pay laeng ti maikarga nga insulator tapno saan a mapasamak ti kapada nga insidente.//Bombo Mera Pacpacan
