Naarestar dagiti lima nga indibidwal a nagtaud iti Itogon,Benguet gapu iti maatap a pakainaiganda iti napasamak nga insidente iti pammaltog idiay Villa Norte Maddela, Quirino parbangon idi kalman, December 24, 2024.
Pakairamanan daytoy ni Patrolman Dave Macanas a nakadestino iti Regional Mobile Force Batallion-15 iti Police Regional Offire-Cordillera, ni Alyas John, Alyas Fred, Alyas Allen, ken Alyas Manong.
Kadwada a naarestar dagiti daduma pay a nagtaud metlaeng idiay Maddela, Quirino kas kenni Alyas Roel, Alyas Mike, ken Alyas Johnny, bayat a dua pay kadagiti suspect iti nagtaud iti probinsya iti Ifugao pakairamanan ni Alyas Rey a manipod Tukukan,Tinoc, ken ti nakatakas a ni Alyas Manny manipod met iti Banaue, Ifugao.
Naarestar dagiti suspect idiay Palacian Aglipay, Quirino bayat a ginandatda iti aglibas babaen iti luganda a van.
Maibasar iti impormasyon manipod Quirino Police Provincial Office, dua nga indibidwal ti nakumpirmar a pimmusay iti nasao nga insidente nu sadino, nabigbig dagitoy a da EJ Rodriguez ken Crisel Cayong nga agpada a residente iti munsipyo iti Maddela.
Kabayatanna, nadangran met dagiti uppat pay nga indibidwal pakairamanan ni June Dave Sebastian, Mike Ramos, Edward, ken Kesha, pasig a residente iti nadakamat a munsipyo.
Iti agdama, addan iti kustodiya iti Maddela Municipal Police Station dagiti nakemmeg a suspect bayat a manarimaan paylaeng iti hot pursuit operation para iti panakaarestar ti nakalibas a ni Alyas Manny.
Manarimaan paylaeng met ti imbestigasyon dagiti kameng iti pulisya iti nasao a probinsya tapno maduktalan ti motibo iti nasao nga insidente.
