BAGUIO CITY – Dumanonen iti dua a personnel ken estudyante ti DepEd-Benguet ti pimmusay a konektado iti COVID-19 manipud nangrugi ti outbreak ti nasao a sakit idi napalabas a tawen.
Sigun kenni Dr. Mary Grace Matias, Medical Officer III ti DepEd-Benguet Division, maysa a manursuro ken maysa a Grade 4 nga estudyante ti adda iti rekord dagitoy a pimmusay nga addaan ti koneksion iti COVID-19.
Kinunana a nakailistada pay iti 291 a teaching ken non-teaching personnel ti DepEd-Benguet a nakaptan ti COVID-19.
Dinakamatna a manipod iti nasao a bilang, dumanon iti 284 ti nakarekober bayat a lima dagiti agpapaimbag paylaeng.
Imbinglay pay ni Dr. Matias a nabakunaanen kontra iti coronavirus ti nasurok 1,300 a personel ti DepEd-Benguet a karaman iti priority list ken dagitoy ket bukbuklen ti nasurok 1,000 a mannursuro ken dumanon 300 a non-teaching personnel.
