Agtultuloy ti imbestigasyon dagiti otoridad iti napasamak nga uram iti maysa a pagtaengan sadiay Purok 28 San Carlos Heights, Irisan, Baguio City ita nga aldaw.
Iti panakiuman ti Bombo Radyo kenni Fire Officer III Benjie Cuyan, kinunana a dua nga ubbing a lalaki nga agtawen iti innem ken pito ti pimmusay iti nasao nga insidente nu sadino maatap a nakaturog dagitoy.
Maibasar iti imbestigasyon, dua kadagiti kabsat dagitoy ket nakaruar iti pagtaenganda idi nagramaram ti uram.
Saan met a klaro nu anya nga oras a napasamak ti uram ngem posible a daytoy ket iti oras ti ala una iti malem.
Naideklara met ti fire out iti oras ti pasado alas dos ti malem babaen panagresponde ti Baguio City Police Office (BCPO) Station 9, BFP Irisan, Irisan Medical Emergency Council (IMEC), Irisan District Health Center ken daduma pay a maseknan.
