Dumanonen iti dua pulo ket tallo ti pimmusay bayat a sangapulo ket lima ti mapukpukaw gapu iti epekto ti Southwest Monsoon ken Tropical Cyclones a Ferdie, Gener ken Helen.
Daytoy ket sigun iti National Disaster Risk Reduction and Management Council (NDRRMC) ita nga aldaw.
Maibasar iti reports, siyam ti nailista a pimmusay sadiay Mimaropa, sag-uppat sadiay Western Visayas, Zamboanga Peninsula ken Bangsamoro Autonomous Region in Muslim Mindanao ken dua sadiay Central Visayas.
Iti sabali a bangir, sangapulo ket dua nga indibidual ti nailista a mapukpukaw sadiay Mimaropa, dua sadiay Zamboanga Peninsula ken maysa sadiay Western Visayas.
Dumanon met iti sangapulo ket lima a katao ti nadangran gapu iti Habagat ken kadagiti tallo a nasao a tropical cyclones.
Kaadoan kadagiti naapektaran ket nailista sadiay Central Luzon a dumanon iti agarup 354-K nga indibidual nu sadino agarup 69-K kadagitoy ket ada iti evacuation centers.
