BAGUIO CITY – Dumanon iti dua pulo ket uppat a pelikula ti nakwalipikar kas finalist para iti partikular a pammadayaw iti makalawas a panakarambak ti Montañosa Film Festival iti Baguio City
Daytoy ket mangrugi inton Marso 16 agingga Marso 24.
Iti interview ti Bombo Radyo kenni Ferdinand John Balanag, Creator ken Festival Director, dumanon iti walo pulo a film entries ti pimmasa iti screening process.
Nupay kasta, dua pulo ket uppat laeng kadagitoy ti nakwalipikar bayat ti nainget a panangtingiting dagiti film industry professionals.
Bukbuklen ti nasao a bilang ti tallo a kategorya a pakairamanan ti documentary, narrative, ken mobile film making.
Mainaig iti dayta, manamnama a dar-ayan dagiti nalalatak a nagan iti nasao nga industriya ti Montañosa Film Festival pakairamanan ni National Artist for Film Ricky Lee, Direk Joyce Bernal, Ryan Cayabyab, Zig Dulay, ken Dingdong Dantes.
Napagnumwan met dagiti maseknan nga indibidwal manipod iti nasao nga organisasyon ken ti kadaklan a mall iti siudad a mangiyuswatda ti film caravan kadagiti nagduduma a branches iti nasao a mall tapno maipabuya dagiti pelikula a naaramid manipod rehiyon Cordillera.
Kabayatanna, innayon ni Balanag a ti nasao a pasken ket paset ti panagregget dagitoy iti panangdecentralize iti film festival a kadawyan a mapaspasamak idiay Metro Manila.
Panggep daytoy nga itandudo dagiti maar-aramid a pelikula iti Cordillera kasta met ti panangipaay ti suporta kadagiti local film makers tapno ad-adda pay a mapasayaat ti film industry iti nasao a rehiyon.//Bombo Rob Dominguez
