BAGUIO CITY – Naduktalan ti gagara a panakapapatay ti dumanon iti 45 a pine trees iti maysa a bakante a lote sadiay Legarda Road, Baguio City babaen iti panangbarenada kadagiti puon wenno tree trunks ken iti panangikabilda iti diluted salt ken kemikal kadagitoy.
Resulta daytoy ti surprise inspection kadagiti 65 pine trees a masarakan iti nasao a lote nga insayangkat ti lokal a gobyerno ti Baguio ken dagiti maseknan nga ahensia ti gobyerno nga indauluan ni City Mayor Benjamin Magalong.
Sigun iti mayor, naigagara ti panakabarena dagiti nasao a kayo ti saleng ken nakabilan pay ti diluted salt ken kemikal kas maibasar metlaeng iti naawatna nga impormasyon.
Impettengna a murder ti napasamak kadagiti nasao a pine trees gaputa in-inot dagitoy a matmatay.
Inkari ni Mayor Magalong a daytoy a mismo ti mangidaulo iti panakaipila ti kaso kontra iti korporasyon nga akinkukua iti nasao a lote ken iti imbestigasyon ti insidente.
Mangisayangkatda pay iti aerial inspection iti nasao a lote tapnu makitada ti pudpudno nga estado dagiti nasao a pine trees.
Kabayatanna, inaklon met ti Department of Environmental and Natural Resources – Cordillera a naipadanun kadakuada ti nasao a pakaseknan ngem saanda pay nga inyum-uman iti opisina ni Mayor Magalong. (with Bombo Brigitte Marcasi)
