BAGUIO CITY- Agtultuloy ti clearing operation ken sandbagging nga ipatpatungpal dagiti otoridad kadagiti lugar sadiay Banaue, Ifugao a naapektaran iti panaglayos ken panagreggaay gapu iti epekto ti napigsa a tudo idi malem kalman.
Iti panakaiuman ti Bombo Radyo iti Ifugao PNP, nangrugi ti napigsa a tudo iti nasao a municipyo pasada alas kwatro idi malem kalman.
Gapu iti daytoy, saan a madalysat dagiti sumagmamano a kalsada sadiay Banawe.
Sumagmamano a balay ti nalayos ken arigna a nagbalin a water falls kalpasan a sinerrek ti napigsa nga ayos ti danum.
Nangitunda daytoy iti pannakadadael ti sumagmamano a balay ken pannakaiyanod dagiti sumagmamano a lugan.
Babaen met iti tulong dagiti otoridad ket naispal dagiti occupants nga agtagikua kadagiti lugan a naiyanod.
Naideklara met ti blackout kadagiti apektado a barangay agingga iti agdama.
Iti inisyal a datus, dumanon iti innem a barangay ken 300 a pamilya ti naapektaran nu sadino tallo a pamilya ti nagbakwit iti Banaue Gymnasium.
Adda ti tallo nga indibidual a naireport a nasugatan ngem dagus a naipaayan dagitoy iti first aid.
Iti agdama ket awan met ti casualty a nailista dagiti otoridad.
Nangipadanon metten ti DSWD idi kalman ti 500 a food packs para kadagiti apektado a pamilya ken manamnama a mangipatulod manen dagitoy iti 1,000 a kanayonan a food packs ita nga aldaw.
