BAGUIO CITY – Naduktalan a nagtaud sadiay Tabuk, Kalinga ti dua a sako a marijuana a nakumpiskar manipud iti maysa a kotse iti naisayangkat a quarantine checkpoint operation sadiay Cordon, Isabela idi kalman.
Immuna iti daytoy, naka-awat dagiti otoridad iti impormasyon nga adda ti kontrabando a karga ti nasao a kotse.
Dagusda a binantayan ti nasao a lugan ken iti panagsukimatda iti daytoy ket nakitada ti dua a sako ti marijuana nga agdagsen ti 16 a kilo ken aggatad ti agarup nasurok dua a milyon a pisos
Naamuan pay a maiturong dagiti nasao a marijuana sadiay Manila.
Nagresulta ti operasyon iti panakakemmeg ni John Patrick Catabona, 26-anyos, driver ti kotse, sales agent ken residente ti Muñoz, Nueva Ecija.
Sigun kadagiti otoridad, sumango ti nasao a lalaki iti nagtutuon a kaso kas iti panaglabsing iti Comprehensive Dangerous Drugs Act of 2002, iti Disobedience to Person in Authority kalpasan a nagkedked a bumaba iti kotse; iti Law on Reporting Communicable Disease gapu iti kaawan ti health certificate ken travel documents daytoy malaksid pay nga awanan iti plaka ti kotse ken nagpason ti lisensia daytoy.