Nakasaganan nga isubmitir ti National Bureau of Investigation kadagiti Department of Justice prosecutors ti ebidensia maipapan ti kinuna ni Vice President Sara Duterte kontra kenni President Ferdinand “Bongbong” Marcos Jr. nu saan a makipaset daytoy iti imbestigasion inton bigat tapno maamuan ti rasonna.
Daytoy ket kalpasan nga inyakar ti House of Representatives Committee on Good Government and Public Accountability ti panagdinggeg ti maipapan ti confidential funds ti Office of the Vice President iti sabali nga aldaw.
Immunan a kinuna ni Vice President Duterte nga iprayoridadna ti panagdinggeg ti House of Representatives ken saan paylaeng a makipaset iti imbestigasion ti NBI.
Sigun kenni NBI director Jaime Santiago, kasapulan a makipaset ni Vice President Sara gaputa nakanselar ti panagdinggeg ti Quad Committe ken rumbeng nga adda ti nasayaat a rason ti nasao nga opisial tapno maitantan ti imbestigasion inton bigat, Nobiembre 29.
Itay laeng kallabes, nangipaulog ti NBI ti subpoena gapu iti kinuna ni Vice President Duterte nga adda ti binilinna a mangpapatay kenni Ferdinand “Bongbong” Marcos Jr.,First Lady Liza Araneta Marcos, ken Speaker Martin Romualdez nu mapapatay daytoy.
