BAGUIO CITY – Maur-urnosen ti Economic Recovery Plan ti siudad ti Baguio kalpasan ti COVID 19 crisis.
Sigun kenni Baguio City Administrator Engineer Bonifacio Dela Peña, saan pay a naipinal dagiti plano uray nagtataripnong ti executive department.
Kinunana a panggep ti lokal a gobierno a maipalpas ti Economic Recovery plan ti siyudad agginga iti Abril 30.
Inlawlawagna a daytoy ket tapnu makasagana ti siudad apaman a maituloy ti extension ti enhanced community quarantine iti Baguio City ken Benguet agingga inton Mayo 15.
Karaman kadagiti prayoridad iti Economic recovery plan ti Construction, Transportation, Business Activity ken dadduma pay.
Agtataripnong manen ita a lawas ti executive department para iti pannakaipinal ti plano para iti panagrekober ti ekonomia ti siudad kalpasan ti parikot maipapan iti COVID 19.
