BAGUIO CITY – Balligi ti kaunaan a Rolling Market ti Baguio City a naisayangkat sadiay Bayan Park, Aurora Hill para kadagiti 13 a babbarangay a saksakupen ti District 9 ken District 19.
Babaen iti programa ket naidanun wenno naiyasideg kadagiti umili kadagiti maseknan a barangay dagiti nagduduma a tagilako, pakairamanan dagiti nateng.
Ti rolling market ket proyekto ti lokal a gobyerno ti Baguio, ti Association of Barangay Council, Department of Trade and Industry – Cordillera ken ti Department of Agriculture – Cordillera kabinnadang ti maysa a dakkel a grocery store iti siudad ken sumagmamano nga agilaklako iti merkado publiko ti siudad.
Panggep ti rolling market a maksayan ti kaadu dagiti tattao nga agturturong iti merkado publiko.
Nainget pay a naobserbaran dagiti pagalagadan kas iti social distancing, panagsuot iti face mask, panangisagana iti listaan dagiti gatangen ken ti panangitugot iti bukod nga eco bags.
Sumaruno a maisayangkat ti rolling market inton bigat, aldaw ti Sabado manipud alas-otso ti agsapa agingga alas-singko ti malem iti paradaan nga asideg ti runway ti Loakan Airport sadiay Loakan Proper Barangay.
Kabayatanna, iti nasao a rolling market ket naigiddan ti Kadiwa ni Ani at Kita On Wheels a nakailakuan dagiti sadiwa a nateng, ikan, karne ken bagas iti nababa a gatad a paset ti programa ti Department of Agriculture kagiddan ti manarimaan nga Enhanced Community Quarantine iti Luzon.
