Panggep pay ni sigud a former ONE Lightweight MMA World Champion Eduard “Landslide” Folayang a maaddaan iti maminsan pay a laban sakbay nga agretiro.
Iti panakiuman iti Bombo Radyo kenkuana, imbinglayna nga adda pay ti aktibo a kontrata daytoy iti ONE Championship.
Malaksid iti dayta, kinuna ni Folayang a saan pay daytoy a nagsarsardeng iti panagensayo ken namintinirna paylaeng ti kondisyon ti bagina.
Bayat nga agur-uray ket makumikom paylaeng daytoy iti panagtulongna iti panagensayo ti daduma pay a kakailyanna a fighter a kas kenni Danny “The King” Kingad nga idi laeng Sabado ket napaay kontra iti kinalabanna a ni Hu Yong iti ONE Fight Night 40: Buntan vs. Hemetsberger II.
Innayon ni Folayang a busbusbusenda pay ti orasda a sanayen dagiti sumarsaruno nga henerasyon dagiti fighters.
Maipalagip a ti kaudian a panakilaban ni Folayang ket idi March 23, 2025 nu sadino, napaay daytoy kontra kenni Shinya Aoki manipod Japan babaen iti Submission iti ONE 172: Takeru vs. Rodtang.
Iti agdama, imet ti Cordilleran Fighter ti 13-12 win-loss record.//Bombo Rob Dominguez
