BAGUIO CITY – Agtultuloy ti panangawat ti Sanggunian Kabataan (SK) Federation ti Baguio City iti kiddaw dagiti SK barangays para iti educational assistance kadagiti estudyante kadagiti parapubliko a pagadalan iti sakop dagitoy a barangay.
Iti interview ti Bombo Radyo Baguio kenni SKF Baguio president ken Councilor Levy Lloyd Orcales, kinunana a maitunos daytoy iti programa ti SK Federation ti Baguio a libre a load para kadagiti estudyante kadagiti parapubliko a pagadalan a maipasidong iti online classes.
Kinunana nga iti agdama ket uppat paylaeng nga SK barangays ti nagsumitir iti kiddawda nga educational assistance ken dagitoy ket naaprobaranen.
Dinakamatna a P1,900 ti gatad ti libre a load a maipaay kadagiti napili nga agtutubo sadiay Fairview Barangay; P5,000 kadagiti mapili sadiay Irisan Barangay ken P1,500 kadagiti mapili sadiay South Central Barangay Aurora Hill.
Innayonna a maigatang met iti school supplies ti kiddaw a pondo ti Quezon Hill Proper ken dagitoy ket maiwaras kadagiti mapili nga estudyante sadiay.
Imbingay ni Coun. Orcales nga agarup met iti 15 a barangay ti saan pay a nakasumitir iti kiddawda gapu iti kinakurang dagit SK kagawad nga intunda ti panagikkat dagiti dadduma kadagitoy.
Al-allukuyenna pay dagiti estudyante iti siudad nga interesado iti nasao a tulong para iti online classes iti panagturongda iti barangay hall iti ayanda a barangay tapnu maamuanda ti umno a proseso. //claire/edtdND
