Kinontra ti Philippine Egg Board Association (PEBA) ti immunan a waragawag ti Department of Agriculture a posible nga agkurang ti suplay ti itlog inton Abril.
Sigun kadagiti egg producers, awan ti makitkitada a panagkurang ti suplay ti itlog kadagiti sumarsaruno a bulan uray adda pay ti kaso ti bird flu.
Dinakamat ni PEBA president Francis Uyehara nga adda ti umdas a suplay ti itlog agingga inton Abril ken Mayo gapu iti sumaysayaat a produksyon ti itlog.
Maipalagip nga itay nabiit ket kinuna ni Agriculture Secretary Francisco Laurel Jr. a nag-oversupply ti itlog idi napan a tawen isunga bimmagsak ti farm-gate price iti P4 tunggal pidaso ti itlog ken ado a local producers ti nalugi rason a napilitanda a partien dagiti agit-itlog a manok.
Gapu iti daytoy, kinuna ni Laurel a bimmaba ti bilang dagiti agit-itlog a manok a posible met a makaapektar iti suplay ti itlog iti masangwanan.
Insingasing pay ti Agriculture Secretary kadagiti local poultry raisers a kasapulanda ti hatching eggs kagiddan ti panagrugi ti panagngato ti demand ti itlog.
Nupay kasta, impetteng met ni Uyehara nga ag-oversupply ti itlog a makaapektar kadagiti local farmers nu matuloy ti plano ti Agriculture Department nga ag-import ti hatching eggs.
