Opisyalen a nagleppas ti makabulan a panag-ayunar dagiti Muslim iti pagilian ita nga aldaw kagiddan ti panakaobserbar ti Eid’l Fitr.
Iti panakiuman ti Bombo Radyo kenni Imam Samsodin Monib, presidente ti Baguio – Benguet Muslim Association, kalpasan ti sakripisyo dagiti Muslim para iti makabulan a panang-obserbar iti Ramadan ket mabalindan ti agrambak iti agdama.
Nupay kasta, inyunay-unay ni Monib a masapol a saan laeng a tunggal Ramadan a malagip ken aramiden dagiti sursuro iti nasao a relihion nu di ket agnanayon daytoy.
Sigun pay kenkuana, naangay ti aktibidad dagiti Muslim iti siudad itay agsapa para iti Eid’l Fitr nu sadino pinasetan daytoy ni Baguio City Mayor Benjamin Magalong.
Maibasar iti obserbasyon ni Monib, ngimmato ti bilang dagiti Muslim a nakipaset iti nasao a panagdadapon nu idilig iti bilang dagitoy idi napalabas a tawen.
Iti sabali a bangir, dinakamat ni Monib a saan a mapukpukaw ti panangipaayda ti taraon kadagiti marigrigat iti komunidadda tapno makasabay dagitoy iti panangrambak ti Eid’l Fitr.
Kabayatanna, sumagmamano met kadagiti Muslim nga addaan ti kabaelan iti panagbiag ti nagturong sadiay Meca para iti panag-obserbar dagitoy iti nasao a selebrasyon.//Bombo Rob Dominguez
