Maipakpakaamo iti publiko nangruna kadagiti motorista a mangrugin inton bigat ti panakaimplementar ti Commission on Elections (COMELEC) checkpoint kagiddan ti panagrugi ti election period.
Iti panakiuman ti Bombo Radyo kenni Atty.John Paul Martin,Election officer iti Commission on Elections -Baguio, kinunana a ti kick-off iti election period ket inton bigat rason a mangrugi ti COMELEC checkpoints kadagiti nagduduma a lugar iti oras ti alas otso ti agsapa ken kanayun daytoyen a maipatungpal.
Sigun kenni Martin, sangapulo ket dua (12) a regular checkpoints ti maipatungpal inaldaw kadagiti nagduduma a paset ti siudad ti Baguio bayat a mabalin a maisayangkat ti spot checkpoint wenno ti emergency checkpoint nu kasapulan.
Babaen iti maipatpatungpal a checkpoints, mapagtalinaed ti linak ken kappia kadagiti nagduduma a paset ti pagilian ken makatulong daytoy iti implementasyon iti gun ban.
Kinuna ni Martin a kadagiti napalpalabas nga election ket adda dagiti sumagmamano laeng a namonitorda a naglablabsing iti gun ban.
Impalagip ti election officer nga iti panaglabsing iti gun ban ket mabalin dagitoy a madiskwalipikar iti panagtakem iti posisyon iti gobyerno rason a liklikkan paylaeng ti panagawit kadagiti igam iti ruar iti pagtaengan malaksid nu naipaayan ti maysa nga indibidual iti exemptions manipud iti Commission on Elections.
Iti sabali a bangir, mangnamnama ni Atty.Martin nga agtalinaed ti siudad ti Baguio iti green category ita nga election period.
Nupay kasta, iti laksid a nakappia iti siudad ket agtultuloy ladta ti panagmonitor ken panagregget dagiti nagduduma nga ahensiya para iti mapadpadaanan a 2025 National ken Local Midterm Elections.//Bombo Mera Pacpacan
