BAGUIO CITY – Makitinnulong ti Benguet State University (BSU) iti ad-adda pay a panakaital-o ti turismo ti Benguet babaen iti panakibinnadangda iti lokal a gobyerno ken iti caretaker congressman ti probinsia.
Sigun kenni BSU president Dr. Felipe Comila, panggepda a maipasdek ti maysa nga elevated walkway iti deppaar ti nalatak nga Strawberry Field.
Kinunana a babaen iti daytoy ket ad-adda a mapapintas ti pagnaan iti nasao nga agri-tourism site a maysa kadagiti daydaywen dagiti turista.
Innayonna a babaen iti nasao nga elevated walkway ket mabalinen a makapasyar iti Strawberry Field dagiti physically challenged a kayatda nga agturong sadiay.
Sigun kenni Dr. Comila, ti elevated walkway ket addaan ti kangato nga agarup dua a metro ken maisukog iti strawberry malaksid a maiparang ditoy dagiti nagduduma a produkto dagiti 13 a munisipyo ti Benguet.
