BAGUIO CITY – Manarimaan ita ti elimination rounds dagiti atleta a mangibagi iti Baguio City iti Batang Pinoy, maysa a national youth sports competition iti pagilian a maangay sadiay Vigan, Ilocos Sur inton Disyembre 4 agingga Disyembre 10.
Daytoy ti kaunaan a national multi-sporting event a maipatungpal kalpasan ti pandemya.
Sigun kenni City Sports Division Head Gaudencio Gonzales, sangapulo ket pito nga ay-ayam ti nakalinya a pasetan dagiti nagduduma a local sports associations.
Kinunana ni Gonzales a magagaran dagiti atleta nga agay-ayam manen iti national sports kalpasan a nakanselar daytoy iti dua a tawen.
Nupay kasta, inlawlawag ti opisyal a saan nga amin nga sport events ket maipatungpal babaen iti face to face kas ti arnis, dancesport, judo, karate, muay, pencak silat, taekwondo ken wushu nu sadino agbalin a virtually dagitoy.
Ti laeng archery, athletics, badminton, chess, cycling, table tennis, swimming, weightlifting ken game sport ti maipatungpal babaen iti face to face competition.
Immunan a dinakamat ni Gonzales a limitado laeng iti 150 nga atleta manipud Baguio City ti mapili manipud iti maipatpatungpal nga elimination.
Inlawlawagna ti Batang Pinoy ket mabalin a mairaman dagiti out-of-school youth, saan a kas iti Palarong Pambansa a dagiti laeng students athlete ti mabalin a maki-ay-ayam.
Ti nasao nga ay-ayam ket suportado ti LGUs, Department of Education ken ti Philippine Sports Commission.