Binabalaw ni Senator Erwin Tulfo ti panangkondena ti Chinese Embassy kadagiti panagsarita dagiti daduma nga opisyales ti Pilipinas mainaig iti West Philippine Sea(WPS).
Sigun kenni Senator Tulfo, awan karbengan ti nasao nga embahada a kondenarin dagiti opisyales iti Pilipinas seknan kadagiti naipablaak a pammaneknek iti panangharass ti China Coast Guard kadagiti Pilipino kasta metten ti maatap a panangagom ti China iti masakupan ti Pilipinas iti nasao a kabaybayan.
Maipalagip a kinuna ni Chinese Embassy Deputy Spokesperson Guo Wei a saan a lisensya ti freedom of speech tapno dadaelen ti lider ti China nu sadino, nadakamat pay ti naipablaak iti social media page ni Philippine Coast Guard spokesperson Commodore Jay Tarriela.
Gapu iti dayta, impetteng ni Senator Tulfo a mabalin nga umalis ti nasao nga embahada manipod iti Pilipinas nu saanda a kabaelan nga awaten ti Konstitusyon ti pagilian ken nu saanda a matarusan ti kaipapanan ti demokrasya iti pagilian.
Kagiddan dayta, inyunay-unayna a nu kayat ti China a raemen ida ti Pilipino ket rumbeng met a raemenda ti Konstitusyon ti Pilipinas ken dagiti umili.
