BAGUIO CITY – Marugianen a maimplementar iti siudad ti Baguio ti emergency employment assistance program ti Department of Labor and Employment (DOLE).
Sigun kenni DOLE-Cordillera Regional Director Exequiel Ronie Guzman, kwalipikado ditoy dagiti trabahador ti informal sector wenno dagiti trabahador nga awanan ti employer-employee relationship.
Kinunana a dagitoy dagiti drivers, dagiti vendors, dagiti agilaklako iti ukay-ukay ken dagiti dadduma nga agtatrabaho ngem awanan ti amo.
Dinakamatna a maawagan ti nasao a tulong kas ‘Barangay Ko, Bahay Ko Disinfecting/Sanitation Project’ ken ditoy a ti DOLE ti mangited iti sweldo dagiti kwalipikado nga agtrabaho iti nasao a programa.
Sigun kenkuana, nakapatangnan ni Baguio Mayor Benjamin Magalong tapnu no mangisayangkat ti lokal a gobyerno iti massive disinfection ket dagiti kwalipikado iti programa ti alaen daytoy nga agtrabaho.
Kinunana a ti swelduen dagiti benipisaryo ket ti kangatuan a minimum a sweldo iti rehiyon Cordillera a P350 tunggal aldaw.
Sagudayen ti programa nga agtrabaho dagiti benipisaryo iti las-ud ti 10-20 nga aldaw.