Emergency jobs kadagiti small scale miners sadiay Itogon, Benguet, ididiaya ti DOLE
BAGUIO CITY – Mangidiaya iti emegency jobs wenno panggedan ti Department of Labor and Employment (DOLE) – Cordillera kadagiti small scale miners iti rehiyon nangruna dagiti residente ti Itogon, Benguet a napukawan iti panggedan gapu iti panakaipawil ti panagminas.
Sigun kenni DOLE-Cordillera Assistant Regional Director Elpidio Ataol Jr., mabalin nga ag-avail dagiti apektado nga residente ken minero iti Tulong Panghanapbuhay sa Ating Disadvantaged/Displaced Workers (TUPAD) Program ken iti Emergency Employment Program (EEP).
Kinunana a manarimaan ti koordinasyonda iti lokal a gobyerno ti Itogon tapnu dagus a mangrugi dagiti maseknan nga agtrabaho.
Dinakamatna a karaman kadagiti public works programs ti DOLE ti panagdalos kadagiti kanal, kalkalsada ken panagpintor kadagiti para publiko a pasdek wenno pasilidad.
Inlawlawagna a ti EEP ket limitado laeng iti 10 nga aldaw ken mabayadan dagiti agtrabaho iti minimum wage a katukad ti kadawyan a sweldo dagiti mammangged iti rehion.
