BAGUIO CITY – Manarimaan ti panangiproseso ti Department of Social Welfare and Development (DSWD) iti emergency shelter assistance dagiti pamilya a naapektaran iti idadalapus dagiti bagyo a Rosita ken Ompong iti rehiyon Cordillera idi napalabas a tawen.
Sigun kenni DSWD-Cordillera Regional Director Janet Armas, 90 a pamilya ti addaan ti totally-damaged houses bayat a 175 ti addaan ti partially-damaged houses ken dagitoy dagiti nakaawat ti shelter assistance.
Kinunana nga un-unaenda ti munisipyo ti Itogon sadiay Benguet ken ti munisipyo ti Natonin sadiay Mountain Province gaputa dagitoy ti agkasapulan unay iti panagnaedan.
Nagyaman met daytoy iti Diocese of Baguio iti rental assistance nga impaay daytoy kadagiti 375 a pamilya a naapektaran iti nasao a bagyo.
Innayonna nga agpatingga ti rental assistance dagiti nasao a pamilya inton Setyembre gaputa puntiryada a makatawen laeng ti rehabilitasyon ti munisipyo ti Itogon nangruna kadagiti nadadaelan ti pagtaengan.
Ikamkamakam met itan ti nasao nga ahensya a maaddaan ti pondo para kadagiti benepisyaryo.
