BAGUIO CITY – Libre a nailukat iti publiko ti Emilio Aguinaldo Museum kagiddan ti panakarambak ti National Flag Day idi kalman.
Inwaragawag daytoy ni Emilio Aguinaldo Suntay III, board member ti General Emilio F. Aguinaldo Foundation ken direkta nga apo daydi banuar a Gen. Emilio Aguinaldo iti panagbitlana iti flag ceremony sadiay City Hall idi kalman ti agsapa.
Maipalagip a ti nasao a museum ket pribado a tagikua ti pamilyada ken sadiay a nakadulin ken makita ti kakaisuna ken orihinal a bandera ti Pilipinas a naiwagayway sadiay Kawit, Cavite idi May 28, 1898 babaen kenni General Aguinaldo kalpasan ti Battle of Alapan.
Imbinsabinsa ni Suntay ti kinapateg ti bandera nga adda kadakuada a mangisimsimbolo iti panagwaywayas ti Pilipinas manipud iti tropa dagiti Espanyol sadiay Alapan, Imus, Cavite.
Sigun kenkuana, ti bandera ket simbolo ti nationalism ken patriotism wenno panagayat iti pagilian a naipakita babaen iti panakilaban dagiti nagkauna a Pilipino kontra kadagiti gangannaet a nangsakop iti pagilian.
Gapu iti daytoy, guyguyuguyenna dagiti amin nga umili iti panangikabil dagitoy iti bandera iti pagtaengan wenno establishimientoda tapnu ipakitada ti panagayatda iti pagilian.
Kabayatanna, libre metlaeng a mailukat iti publiko ti kapada a museum inton Hunyo 12 a panakarambak ti panagwaywayas ti Pilipinas.