Maiyunay-unay kadagiti empleyado wenno laborers nga agpatulong kadagiti kameng iti National Labor Relations Commission (NLRC) nu makapaspasar dagitoy iti parikut mainaig kadagiti pangpanggedanda kas iti saan nga umno a pannakaipaay iti sweldoda ken dadduma pay a pakaseknan.
Sigun kenni Attorney Raymund Celino, Executive Labor Arbiter iti NLRC-Cordillera, imbinglayna a malaksid iti Department of Labor and Employment(DOLE), addaan ti opisina dagitoy iti partikular a bileg wenno jurisdiction a duma iti jurisdiction ti DOLE.
Dinakamat ni Atty. Celino a mangipatpatungpalda iti Single Entry Approach (SENA), maysa a sistema para iti panakarisut dagiti pakaseknan iti trabaho a mangipaay iti 30 nga aldaw a proseso ti mandatory conciliation-mediation.
Panggep daytoy a mangipaay iti napartak, saan a mangidumduma, saan a nangina, ken accessible a pamay-an iti panangrisut kadagiti parikut iti trabaho.
Innayon ni Atty. Celino a malaksid iti personal a panagbisita dagiti empleyado kadagiti nadakamat nga opisina, mabalin metlaeng dagitoy a mangipila iti reklamo online.
Mabalinda a bisitaen dagiti websites wenno online portal iti National Labor Relations Commission wenno ti National Conciliation and Mediation Board (NCMB) a karaman iti Department of Labor and Employment(DOLE).
Kabayatanna, kinuna met ni DOLE-CAR Regional Director Imelda Romanillos a silulukat ti opisina dagitoy a mangdengngeg ken mangipaay iti solusyon kadagiti parikut dagiti empleyado kadagiti pagpapaayanda.//Bombo Genzel Depayso
