BAGUIO CITY – Natiliw ti maysa nga empleyado ti provincial government ti Abra ken ti live-in partner daytoy gapu iti panaglabsingda iti RA 9165 wenno ti Comprehensive Dangerous Drugs Act of 2002 ken iti RA 10591 wenno ti Comprehensive Firearms and Ammunition Regulation Act.
Nabigbig dagitoy a da Ariel Dumlao Benedito, Provincial Foreman ti Abra ken ni Liza Echave Abella.
Natiliw dagitoy iti buy-bust operation nga insayangkat dagiti operatiba ti pulisya ken PDEA sadiay Surcoc, Bangbangar, Bangued, Abra idi malem kalman.
Nakumpiskar kadagitoy ti agarup nasurok dua a gramo ti maatap a shabu nga aggatad ti mapattapatta nga agarup P17,000, maysa a paltog, maysa a magazine a naglaon iti pito a bala, ken ti motorsiklo nga inaramatda iti transaksion.
Narekober met iti ikotda ti naaramat a buy-bust money.
Naamuan a ni Benedito ket nakalista kas High Value Individual iti iligal a droga.
