Inlaylayon ni President Ferdinand ”Bongbong” Marcos Jr. ti kontrata dagiti contractual ken job order workers iti gobyerno a naituding nga agpaso wenno agleppas koma inton Disyembre trentay uno ti agdama a tawen.
Maibasar iti datus, lima nga ahensiya ti gobyerno ti addaan ti kangatoan a bilang dagiti contract of service (COS) ken job order (JO) workers.
Karaman ditoy ti Department of Public Works and Highways nga addaan ti 29,275; Department of Health nga 18,264; Department of Education nga 15,143; Department of Social Welfare and Development nga 13,770; ken Department of Environment and Natural Resources nga 10,990.
Sigun iti Presidential Communications Office, napagdesisyonan ti presidente nga ilaylayon ti kontra dagiti contractual ken job order workers tapno ad-adda pay a mapalawa ti pannakaammoda iti trabahoda ken makwalipikarda iti plantilla position iti gobyerno.
Gapu iti daytoy, imbes nga agleppas ti kontrada inton Disyembre 31, 2024 ket mailaylayon agingga Disyembre 31, 2025.