Ngimmato ti employment rate iti Baguio-Benguet ita a tawen.
Iti interview ti Bombo Radyo, kinuna ni Imelda Buyucan, Chief Statistical Specialist ti Philippine Statistics Authority (PSA) – Benguet, 96.7% ti employment rate a nairekord dagitoy.
Nangatngato daytoy nu idilig iti 95.5% nga employment rate iti entero a pagilian.
Dinakamat ni Buyucan nga ado ti agtrabtrabaho iti sektor ti agrikultura ken iti industry and services.
Sigun pay kenkuana, 64.3% ti labor force participation ti publiko.
Kabayatanna, nailista met ti 16.8% nga underemployment rate.
Inlawlawagna a dagitoy dagiti indibidual nga addaan ti extra wenno kanayonan a trabaho gapu ta makuranganda iti oras ti trabahoda.
Iti agdama ket agtultuloy latta ti binulan a survey ken census of population monitoring system ti ahensiya kadagiti nagduduma a babbarangay.//Rose
