BAGUIO CITY – Naksayan ti unemployment rate wenno bilang dagiti indibidual nga awanan panggedan iti rehiyon Cordillera nangrugi ita a tawen.
Iti interview ti Bombo Radyo Baguio, kinuna ni Department of Labor & Employment (DOLE-CAR) Regional Director Nathaniel Lacambra a dumanon iti nasurok 93% ti employment rate wenno addaan trabaho ita a tawen manipud iti 74% a nailista idi Abril 2020.
Inlawlawagna a napartak ti panagbaliw ti datus seknan iti employment ken unemployment rate iti rehiyon nga intunda ti panagbaliw-baliw dagiti quarantine classifications.
Inayonna a nakatulong ti panakaipasidong ti rehiyon iti nababbaba a lebel ti quarantine classification gaputa napalubosan dagiti nagduduma nga establisyemento nga aglukat ken agawat iti empleyado dagitoy.
Malaksid iti dayta, imbinglayna pay dagiti wagas nga ar-aramiden ti ahensia tapnu matulongan dagiti indibidual nga awanan ken napukawan iti panggedan kabayatan ti pandemya.
Dinakamatna a maysa ti COVID-Adjusment Measure Program nga ipapaayda kadagiti displaced workers iti sektor ti turismo, AKAP assistance ken TABANG OFW kadagiti displaced workers nga OFW ken TUPAD Program kadagiti informal sector iti rehiyon Cordillera.
