Inawagan ti prosecution witness a ni sigud a LandBank DepEd branch manager Nenita Camposano nga ‘unusual’ ti encashment dagiti tseke nga agatad iti P37.5 Milyon tunggal enchashment.
Daytoy ti nagbalin a sungbatna iti panangtingiting ni Senator-judge Imee Marcos iti encashment dagiti tseke para iti Department of Education.
“Unusual siya sa Department of Education dahil during my time, ‘yon lang po ‘yong malaking withdrawal ng Department of Education,” sigun kenni Camposano.
Dinelaw met ni Senator Imee Marcos ti agsabali a sungbat daytoy, Sigun iti senadora, dinakamat ni Camposano iti panagdenngeg ti House of Representatives a dakkel ti encashment ti gobyerno ken regular a maisaysayangkat ti encashment dagiti pribado a kliyente. Gapu iti daytoy, nadamag ni Sen. Imee nu apay nga ita ket awawaganna daytoy nga ‘unusual’.
Inlawlawag met ni Camposano a nu ti sibubukel a branch ti banko ti mapagsasaritaan, normal wenno ‘usual’ laeng dagiti dadakel a withdrawal gapu ta ada ti dadduma a pribado a kompanya a mangiparparuar iti dadakel a gatad ti kwarta.
Nupay kasta, kinunana nga awawaganna daytoy nga ‘unusual’ gapu ta para iti Department of Education laeng daytoy.
Sigun kenkuana, iti las-od ti panangserbina iti nasao a branch, diyay laeng ti umuna a gundaway a naaddaan iti kasdiay kadakel a cash withdrawal ti Department of Education.
Innayonna a ti kadawyan laeng a dumandanunan ti withdrawal ti DepEd iti branch dagitoy ket dumanon laeng iti agarup P10 milyon isu’t gapunna a kinunana a ti uppat a transaksyon a sag- P37.5 milyon ket ‘unusual’ iti branch dagitoy. //bombokaren.c.sapirao