Manarimaan itan ti enrollment period iti Department of Education-Cordillera para iti panaglukat iti School Year 2025-2026.
Ti enrollment period ket nangrugi idi kalman ken naituding nga agleppas daytoy inton June 13.
Iti panakiuman iti Bombo Radyo kenni Cyrille Gaye Miranda, spokesperson iti Department if Education-Cordillera,impettengna a nasaysyaat nu nasapsapa nga agpaenroll dagiti estudyante tapno maliklikan a maibusan iti slot wenno saan a maawat kadagiti pagadalan a panggepda a serkan.
Inlawlawag ni Miranda a nupay kayatda nga iyakomodar amin nga estudyante, saanda a mabalin nga ipilit nu saanen a kabaelan ti pagadalan nga iyakomodar dagitoy.
Gapu iti dayta, maysa kadagiti ub-ubraenda ti panangirefer kadagiti estudyante a saan maakomodar kadagiti daduma pay a pagadalan a kaasitdan iti immuna a nagenrollanda.
Sigun pay kenni Miranda, iti baet a mabalinda pay nga umawat kadagiti late enrollees, nasaysayaat latta a saandan nga urayen ti maudi a gundaway a mabalinda pay a maawat kadagiti pagadalan.
Immuna metten a naipadamag nga inton June 16 ti opisyal a panaglukat iti klase kadagiti pagadalan iti elementarya ken sekondarya.
Iti benneg iti Department of Education-Cordillera, saan pay dagus a mandatory ti panagaramat iti school uniform laketdi, dagiti ikawes dagiti estudyante ket disente ken maitunos iti dress code kadagiti pagadalan.//Bombo Rob Dominguez
