BAGUIO CITY- Guyguyuguyen ni PMA Spokesperson PLT. CHRISTINE MAE CALIMA dagiti nagannak ken agtutubo iti panakipasetda iti Entrance Examination ti akademya.
Iti interview ti Bombo Radyo Baguio, kinuna ni PLT. Calima a mabalin nga agaplikar iti eksaminasyon babaen ti panagrehistro iti online, mail ken walk-in.
Nasken laeng nga isubmitir dagiti dokumento a nailanad iti facebook page dagitoy wenno iti admission.pma.edu.ph. para iti tsansa makapasa iti eksaminasyon ken agbalin a kadete a mangbukel to iti PMA Class of 2027.
Inlawlawagna met nga awan pay ti naituding nga aldaw ti eksaminasyon gaputa agbasarda iti kasasaad ken alert status kadagiti lugar a pakaangayan ti simultaneous examination.
Daytoy ket kalpasan a naipatungpal ti clustering iti eksaminasyon idi napan a tawen gapu iti agduduma nga alert status ken restrictions iti pagilian.
Kagiddan iti dayta, pinunas ni PLT. Calima ti amak ti publiko nangruna dagiti nagannak mainaig iti isyu ti hazing wenno panagmaltrato iti uneg ti PMA.
Sigun kenkuana nangrugin ti implementasyon dgiti inisyatibo ken programa tapnu mapaksiat ti maltreatment iti akademya a pakairaman ti pannakaimuntar ti CCTV sadiay ken exchange programs nu sadinno adda dagiti kadeta a maipatulod iti dadduma nga pagilian para iti military trainings.
Inkarina met kadagiti nagannak ti panangipaayda ti kalidad a panagsanay ken edukasyon para kadagiti agtutubo wenno kadete a panggepda ng agserbi iti Armed Forces of the Philippines.
